Өксөкүлээх Өлөксөй оҕолоруттан соҕотоҕун ордон хаалан удьуору салҕыыр төлкөлөммүт уола Р.А. Кулаковскай быйыл төрөөбүтэ 100 сылын көрсө тахсар хомуурунньугар кини араас кэмҥэ суруйбут айымньылара киирдилэр. Кинигэҕэ киирбит сэһэннэр, кэпсээннэр бэрт дьэҥкэтик кини уһулуччу суруйааччы буоларын, тыла-өһө байҕал курдук баайын, дириҥин кэрэһэлииллэр. Дэлэҕэ Суорун Омоллоон: "Реас тылы билэрэ, былыргыны өйдүүрэбиир бэйэбиттэн быдан таһыман", - диэн этиэ дуо? Төһө да уустук олоҕу олорон ааспытын иһин, онтон сүрэ тостубакка, кини айымньылара , төттөрүтүн, дьоҥҥо-сэргэҕэ, оҕолорго, кыылга-сүөлгэ, айылҕаҕа муҥура суох тапталынан толорулар. Кини хабар тиэмэтэ киэҥ - былыргы олохтон детективкэ тиийэ.

Суруйааччы саха литературатыгар биир маҥнайгынан айылҕаны сэтэ-сэлээнэ суох сэймэктээһинтэн кыланар сүрэх иэйиитин хоһуйбута. Оҕо эрдэҕиттэн айылҕа көстүүлэрин, көтөр-сүүрэр сылдьар ыырын, быһыытын-таһаатын, майгытын-силигитин Таатта кырдьаҕастарыттан такайыллан, булчут бэрийэр бэрдэ, биолог учуутал быһыытынан билэрин дьоҕурдаах суруйааччы буолан айымньыларыгар туойбута - бу кини биир улахан уратыта.

читать онлайн