(1916-1975)

1916 с. 1-кы Байаҕантай нэһилиэгэр төрөөбүтэ. "Кыһыл Танда" колхозка чилиэнинэн киирбитэ. 1928-35 сс. Танда 7 кылаастаах оскуолатын, 1956 с. Мүрү орто оскуолатын, 1958 с. Дьокуускайдааҕы культпросвет оскуоланы бүтэрбитэ. Идэтинэн библиотекарь, журналист этэ. 

Готовцев К.А. 1940 сыллаахха Бороҕоҥҥо көһөн киирэн оройуон тэрилтэлэригэр үлэлээбитэ.

1941-1946 сс. армияҕа 600 №-дээх сибээс туспа батальонугар, онтон Борзятааҕы бөҕөргөтүүлээх оройуоҥҥа 967-с көһө сылдьар байыаннай госпитальга суруксутунан, 1943-45 сс. 67-с саппаас стрелковай полкаҕа сулууспалаабыта. Империалистическай Японияны утары сэриигэ кыттан баран демобилизацияланыар диэри 413-с байыаннай ыскылаакка харабыллаабыта. Дойдутугар Бороҕоҥҥо төннөн кэлэн культура систематыгар, "Союзбэчээккэ" үлэлээбитэ. 1963-74 сс. оройуоннааҕы библиотека сэбиэдиссэйэ. Бу сылларга урукку буойун сытыы бөрүөлээх, сыралаах үлэлээх, сынтарыйбат-сылайбат корреспондент буолбута. Кини бэчээттэтэр ыстатыйаларын тиэмэлэрин ыыра киэҥ, хабар интэриэһэ эгэлгэ буолан: "Били, корреспондент Готовцев дуо?" диэн атын Готовцевтартан араарыллан ааттанар буолбута. К.А. Готовцев 1935 сылтан саҕалаан өлүөр диэри уруучукатын ыһыктыбатаҕа. Республика хаһыаттарыгар, сурунаалларыгар, радиокомитекка, байыаннай уокурук хаһыатыгар (1941-46 сс.), Советскай Союз бэчээтигэр: "Учительская газета", "Советская Россия", "Советская культура" хаһыаттарга, "Бюллетень союзпечати" диэн таһаарыыга кини ыстатыйалара бэчээттэнэллэрэ.

Константин Александрович 1964 сылтан ССРС Журналистарын союһун чилиэнэ. Ыарыһах киһи, айгыраабыт доруобуйатын аахсыбакка, тыһыынчанан страницалаах айар үлэтэ үрдүктүк сыаналаммыта. Саха АССР Верховнай Советын Президиумун Бочуотунай грамотатынан икки төгүллээн наҕараадаламмыта.

Кини курдук олоҕун устата общественнай үлэҕэ актыыбынайдык кыттыбыт, бэчээккэ тиһигин быспакка суруйбут киһини көрдөөн булар уустук. Улууһун олоҕун утумнаахтык бэчээккэ сырдаппыт үтүөтэ умнуллубат.