НИКОЛАЙ АЛЕКСЕЕВИЧ ОРЛОВ ОЛОҔУН КЭРЧИК КЭМНЭРЭ

Аҕа дойду Улуу сэриитин кыттыылааҕа, тыыл, үлэ бэтэрээнэ, Саха Өрөспүүбүлүкэтин тыатын хаһаайыстыбатын үтүөлээх үлэһитэ, Уус Алдан улууһун, Хоро нэһилиэгин бочуоттаах олохтооҕо.

1925 сыллаахха Чараҥ Илин Бырдьаҕатыгар “Кураанах Толоон” диэн ааттанар үрэх сиригэр төрөөбүтэ.
1934-1938 сс. Чараҥ алын сүһүөх оскуолатыгар үөрэммитэ.
1938-1939 үөрэх дьылыгар Мүрү ситэтэ суох орто оскуолатын 5-с кылааһыгар үөрэнэ киирэр. Кэлин, аармыйаттан кэлэн баран,
1950 с. Мүрү орто оскуолатын кэтэхтэн үөрэнэн бүтэрэр.
1941-1942 сылларга “Кыһыл Маяк” холкуоска балык бултааһыныгар, үүт табаарынай ферматыгар учуотчугунан, Танда дьаамыгар, холкуос сыллааҕы отчуотун оҥоһуутугар үлэлээбитэ. “Ийэ дойду иһин, фронт туһа” диэн ыытыллар тыыл бары үлэтигэр икки хараҥаны холбоон сылдьыбыта.
1943 с. бэс ыйын 3 к. Чурапчы военкоматынан Кыһыл Аармыйа кэккэтигэр ыҥырыллан, Монгольскай народнай өрөспүүбүлүкэ Чайболсан куоратыгар 141-с отдельнай караульнай ротаҕа сулуусбалаабыта.
1944 сылтан Тамцак-Булакка 80-с стрелковай полк 6-с ротатыгар минометчигынан сылдьыбыта.
1945 с. атырдьах ыйын 9 күнүттэн балаҕан ыйын 3 күнүгэр диэри Забайкальскай фронт 53-с аармыйатын 55-с стрелковай отдельнай Хинганскай полк састаабыгар сылдьан милитаристкай Японияны утары сэриигэ кыттыбыта.
 1948 с. дойдутугар эргиллэн кэлэн, төрөөбүт холкуоһугар счетоводунан, звеноводунан үлэлээбитэ.
1950-1953 сылларга Дьокуускайдааҕы холкуостар бэрэссэдээтэллэрин бэлэмниир тыа хаһаайыстыбатын орто оскуолатыгар үөрэнэн агроном идэтин ылбыта.
1953 сылтан “Маленков” холкуос кылаабынай агрономунан, холкуос бэрэссэдээтэлин солбуйааччытынан, биригэдьииринэн үлэлээбитэ.
1970 сылтан оройуон тыатын хаһаайыстыбатын производственнай управлениетыгар инженер-тутааччынан, старшай инженер-мелиораторынан үлэлээбитэ.
1953 с. балаҕан ыйыгар Мария Петровна Самсоновалыын ыал буолан 41 сыл эйэ дэмнээхтик олорбуттара. Орловтар дьиэ кэргэн үс оҕону төрөтөн, улаатыннаран, ыал оҥортообуттара. Билигин кинилэр олохторо сиэннэригэр, хос сиэннэригэр салҕанар.